> Zurück

1996 - "Mir fön emol aa"

Peter Bürki 01.01.1996

Sujet: "Mir fön emol aa..."

D Fasnacht 1996 isch mini erschti Fasnacht gsi. Nadyrlig mag ich mi nüm an alli Ainzelhaite errinnere, aber e paar Yydrück sin scho bliibe.
Mini erschti Fasnacht het e Joor vorhär aagfange, wo ich als normale "Zvilischt" an d Fasnacht bi go luege. Am Mäntig Obe, so um die halbi säggsi han ich bim Coop am Aescheplatz e tolle Waggiswaage gse, wo grad fertig gsi isch mit em Usmischte (D Räschte vom Material uusewärfe). Won ich nöcher aanegange bi, han ich gmerggt, ass ich jo eine vo dene Waggis kenn. Es isch dr Ätu gsi, wo mit mir in dr gliche Einheit WK macht. Mir sin ins Gspröch koo und scho bad han ich e Kännli in der Hand ka. So mit dr Zyt han ich ihm denn verzellt, ass es scho immer mi Buebetraum gsi isch, ufeme Waggiswaage mitzfahre. Er het denn gmeint, mir welle das denn noch dr Fasnacht emol aaluege.
Wies dr Zuefall eso het welle, hän mir in däm Friehlig e WK kaa, so ass mir uns wieder troffe hän. Nadyrlig sin mir wieder uf d Fasnacht zspräche koo. Und da ich nochwievor s' Interässe bekundet ha, het er gmeint ich soll doch noch em WK emol ane Hock ins Restaurant Steibock koo. Gesagt - getan.
An däm Hock - i mag mi no guet errinnere - hän die mi vollglaberet. Was alles abgoht an dr Fasnacht, was nit abgoht; uf was i muess luege an dr Fasnacht, uf was nit... usw. Trotzdäm bi i e Monät spöter wieder an e Hock, will es sin jo eigentlig glatti Kaibe gsi. 
Jo und denn im Winter isch es losgange mit em Waagebau. Alles neu und spannend für mi. Dä Räscht het zwor gli gmerggt, ass i nit e Heimwärkerkönig bi, aber es brucht jo zum Glügg au Handlanger.
Als Sujet hän mir ka: "Mir fön emol aa..." Lang bivor es denn tatsächlich eso wit gsi isch, hän mir bereits mit em Umbau vom Joggeli-Stadion aagfange. Unsere Waage isch e grossi FCB-Baustell gsi und mir sin als "Giovanni" kräftig am Krampfe gsi.
Vo de Fasnacht sälber weiss ich nüm allzu vyyl: es isch herrlig Wätter gsi - eifach e Träumli. Und e neui Tradition hän sie bi mir ebefalls aagfange. Eine, wo s'erschte Joor bi de Primidoofe drby isch bekunnt e "L" uf e Rugge. Do mir in der Bauarbeiterkluft umegloffe sin, hänn sie mir e riesigs L diräkt uf d Kutte gmoolt.

Jo und sit denn hets mi nüme losgloo... und du bisch Tschuld, Ätu oder söll i doch besser saage: "Merci, Ätu!"