> Zurück

2003 - "Kampf em Kulturgyz"

Phil Kunz 01.01.2003

Sujet: "Kampf em Kulturgyz"

E Stadt wo duet an dr Kultur spare und will e Kulturstadt sy - nai das kaas wirglig nid sy!
Mir sin 8 Kilt-Waggis wo uffem Kampfkoloss gege dr Kulturgyz kämpfe.
E wunderscheene, fascht e bitzeli zwarme Morgestraich. Die aggtive hänn natiirlig wiedr ihri Gescht im Käller derfe bewirte. Es isch e fraid gsi, sovyyl Lyyt zha. Mir bedangge uns an dere Schtell fiir eyri Treyi.

Dr Määntig e heerlig Daag bi Sunneschyyn und blauem Himmel und tatsächlige 21 °C; wär hätti das glaubt!

 

Die Fasnacht schtoot ganz im Zaiche vonere Matrialschlacht und Schotteregg. Mir hänn jo tatsächlig die unglaubligi Aazahl von 11tausig Riegel dere vertaile!!! Do het e mängge Innerschwyzer sini Vorrotskammere kenne uff-fille. Ebeso mit anderem Wurfmaterial hänn mir au nid miesse spare. Eso isch e jede Zueschauer uff sini Keschte ko, und mir hänn e huffe Spass ka bim wärfe. Dr aind odr anderi K.....-Stand isch halt denn e weneli unter "Beschuss" grote. Sorry gäll !!! Aber andr Fasnacht muesch halt nid welle wingge und immer no meh welle.

Ybrigens, an alli Frischling am Cortége:

  • Me drait e Blaggedde (Schwoobe: Festabzeichen)
  • Mir drage e Larve und nid e Masge
  • Me sait "Blätzli-Bajass" und nid "Dachziegelspitzhaubenkasperl"
  • Me duet nid bättle - und me sait danggscheen
  • Mir wärfe Räppli und nid Konfetti
  • Mir hänn e Süschet (Sujet) und nid e Thema
  • Mir trage Zoggeli und nid Holzschuhe
  • Me schiesst Nyyt em Waggis ah odr zrugg - sunnscht gits gopferd.... Lämpe hösch!!!
  • und und und.... !

Dr Zyschtig isch fiir unseri Kinder do. Au das e wunderbare Nommidaag gsi, bi herrlig Wätter. Unseri Kinderwägeli isch wieder bis uff e letschte Platz gfillt gsi. Jede Binggis het si bescht gäh und wie die grosse Primidoofe Dääfi und Orange vertailt und Räppli gschosse.

Zobe sinn mir denn wie maischtens ins Glaibasel ins Dreyegg e bitzeli go Gugge loose und in de Baize "umeleuege". Dr Aint odr Ander isch denn wäge Beschwärde friener Haim.

Am Mittwuch hänn mir denn nimmi eso scheen Wätter kha wie am Mäntig. Es isch "herrlig" kalt gsi, und es het ordetlig "unde" duure zoge, bi unsere Schotte-Regg. I glaub dr Aint oder Anderi het denn scho wullige Unterhoose azooge, oder nid? Uff jede Fall isch es dr absolut Gaudi gsi, emol e Rogg derfe ztrage. Mir wisse hit nonig, worum gwissi Gschlächter eso brenned intressiert dra sinn, was mir drunter a ka hänn. Aber ebe, e Schott isch e Schott und dä het eppis a oder nid.

Ybrigens fiir alli Schdadischdiger: Jo mir hänn denn unseri zwai Whisky Buttle no mege.

Alles in allem, e herrlig Sujet und e herrligi Fasnacht 2003!!!