> Zurück

2004 - "E Odysee - E Irrfahrt dur die letschte 75 Joor (vo de Pfluderi)" Partnerfasnacht mit Pfluderi

Micha Wicki - Sujet-Obmaa, Pfluderi 01.01.2004

Sujet: "E Odysse - E Irrfahrt dur die letschte 75 Joohr (vo de Pfluderi)"

Jä, dis Joohr isch d Fasnacht e biz anders usgfalle als in de letschte Joohre. Dr Stammverein vo de Pfluderi (wo im `04 ihr 75ig jööhrigs Jubiläum hän derfe fiere) und die Primidoofe hän fyr d Fasi`04 fusioniert! Und so het das ganze aagfange:

Bereits scho im Aprile `03 het sich d Sujetkomission vo dr Pfluderi zur ihre erschte Sitztig troffe; unseri Kepf hän graucht! Es isch nämlig gar nit e so aifach, e Jubiläums-Sujet z kreiere, ohni dass es in e Personekult usartet oder mir uns aifach nur als scheene Zug presentiere. S Ainzig, was mir dert scho gwüsst hän isch, dass mir gärn wurde e Waage im Zug ha, do d Pfluderi-Clique bis vor e paar Joohrzähnt au no e aigene Waage baut het. Und so sin mir denne dur e Sujetkomissionsmitglied uf die Primidoofe troffe (immer die Turnlehrer *grins*). Ich ha denne mit em Phill vo de Primidoofe aaglüte und mir hän denne über e meegligi Zämmearbet greedet; natyrlig ha ich ihm scho im Vorfäldu unser Sujet (das isch während dere ganze Zyt eifrig usgarbeitet worde) verrote. Dr Phil het denne am Herbschtbummel vo de Primidoofe die andere Mitglieder über unseri Idee informiert und uns denne s griene Liecht fyr e gmeinsams Projäggt gäh. Mir hän uns denne im Summer im glaine Rahme im Restaurant Schnabel für die erschti gmeinsami Sitzig troffe und denne isch es au scho losgange! Vilicht sött ich do no erwähne, wie d Figure usgseh hän:Die Primidoofe / d Vorträbler: Trojanischi Grieger, in gääl und bruun
Dr Waage: s trojanische Ross
D Latärne: e griechische Segelschlabbe; s Seegel zaigt d Irrfahrt dur die letschte 75 Johr
D Pfyffer: "Sirenene" in gold und blau
Dr Major: dr aiäugig Zyklop
D Tamboure: "Minotaure" in gold und gääl

Am Waagebau hän sich den au ainigi vo de Pfluderi betailigt (wobi dr aint oder ander Bohrer si Läbe het miesse loh) und es isch e super Zyt gsi, wo mir im Vorfäld an de Samschtige in Mungestai verbrocht hän. Es isch e wahri Frayd gsi, vo Wucheänd zue Wucheänd d Fortschritt kenne z gseh, iwe us em Grundgyscht e trojanisch Pfärd worde isch!

Am Samschtig Nomidaag vor dr Fasnacht isch es denne ändlig e so wyt gsi: D Waagevernisage isch uf em Terminkaländer gstande! E groosi Delegation vo de Pfluderi het denne au dr Waage mit rassige Märsch yydrummlet und -pfyffe und zur Yberraschig vo allne het dr Kynschtler vo de Junge Garde no s gmoolte Stäggelatärnli, wo d Waage-Clique in uftrag gäh het, in no liicht kläberigem Zuestand yberreicht; es isch e wunderscheens Lämpli worde! Dangge vielmol an dere Stell an Andy Racheter.

Am Sunntig denne isch dr Lampe-Apèro vo dr Pfluderi uf dr Pfalz gsi. Obwohl die Herre "Primidoofe" am Samschtig no gmeint hän, dass es ihne wohrschinlig nit wurd länge, sin denne doch 100% vo ihne aawäsend gsi. D Yberraschig isch ihne uf jede Fall glunge! Bi ar...kaltem Wind hän mir denne dr Wäg zum Schnabel unter d Fiess gno, wo mir denne no zwei, drei Schlummerbächer zue uns gno hän.

Dr Morgestraich isch e Traum gsi: kalt, aber trocke und stärneklar! Schlicht und aifach genial!!! Während mir vo de Pfluderi unterwägs gsi sin hän die Primidoofe wie all Johr in ihrem scheene Käller d Gescht bewiirtet.
Denne am halber 3i am Mäntig Nomidaag isch es denne ärnscht worde: D Pfluderi het sich vor em Schnabel zum Abmarsch uf e Cortege bereit gmacht. Fyr mi isch das e hektische Momänt gsi: Het jede s Goschdym e so aa wie das dr Kynschtler und d Schnyydere sich vorgstellt hän? Sin d Latärneträger und d Requisitezieher do? Und scho hets ghaisse "die Alte, Arabi; Vorwärts Marsch!", dr Zug vo de Pfluderi het sich in Bewegig gsetzt. Doch s schwirigschte isch uns allne no bevor gstande: s Yyfädle uf dr Route! Dr Waage isch scho vom Spiegelhof här unterwägs gsi und mir hän uf unseri Frynde in dr Grienpfohlgass gwartet! Und wos denne sowyt gsi het alles iwandfrey wie im Bilderbuech klappt! E Herrlige Cortège isch es gsi; s Wätter het mitgspielt, d Stimmig isch super gsi und in de Pausene isch dr Waage zue ne me richtige "Tollhaus" mutiert (minus ai Fläsche Baccardi!! Es het anschiinend Lüt gäh, wo bim z`Nachtässe Kopfrächnige glöst hän.......)!
So gege die 10i z`Oobe hän mir uns alli no mol troffe und die Primidoofe sin mit yygstande zum go gässle. Noch e paar Rundene hän sie sich an dr Schiffländi vo uns verabschiedet und beschlosse, in ihre Käller z goh. E Paar Tamboure hän sie denne no musizierend dr Rhysprung deruff beglaitet (Herrlig, e Retraite untermohlt mit em Schlurbbe vo de Zoggeli). So isch dr Mäntig au scho wieder verbi gsi......

Am Zyschtig isch s Wätter aigentlig guet gsi, abgseh vo e paar verainzelte Schneeflogge. Au d Temeprature sin richtig fasnächtlig gsi. Die Primidoofe hän d Kinderfasnacht gnosse und d Pfluderi isch am Nomidaag au mit Kind und Keegel unterwägs gsi.
Zoobe denne hän d Pfluderi e bsundere Zug uf d Bai gstellt: Alli hän öpis miesse aazieh wo mit em Thema Schloofe z tue het. Es sin wirglig super Sache derbi uuse ko und es isch e ganz e tolle Oobe worde. Au die Primidoofe sin unterwägs gsi und wo sie uns noch ihrem Arbetsyysatz in ihrem käller uns am Noodlebärg sin go bsueche isch es natürlig e grooses Hallo gsi. Laider hän mir grad wieder miesse yystoh, so dass es nur für e gmeinsams "Rennerbierli" glängt het.
Was die Primidoofe am Zyschtig z'Nacht unternoh hän entzieht sich mim Wysse; vo däm här miend Dir si sälber frooge ;o)

Somit sin mir scho bim Mittwuch aakoh. S Wätter isch e Traum gsi: Strahlend blaue Himmel, d Sunne het gschiene und d Temperature sin sehr agnähm gsi (dr Petrus isch halt doch e Basler)! Dismol isch es mit em Yyfädle uf d Route genau umgekehrt zum Mäntig gsi: D Pfluderi isch uf d Route und die Primidoofe hän vor em Märthof uf uns gwartet. Scho vo wytem het me dr Waage (dr trojanischi Kampfdaggel *grins*) könne gseh und zue de Lukene us hän uns die Primidoofe mit e me Struus Mimose winkend begriesst. 
Noch em Cortège denne hän mir in dr Falknerstroos dr Waage verabschiedet: Dr Waage isch vor em H&M gstande und d Pfluderi het sich im Halbkrais dervor ufgstellt; die ganz Falknerstroos isch somit blockiert gsi. Alli siebe Primidoofe hän zue uns uuse gluegt und mir hän denne zum Abschluss unsere Jubiläumsmarsch, dr "Colonel-Boogie" gspielt. Es isch eifach e unvergässliche Momänt gsi: Es het super döhnt, die Primidoofe hän uns im Taggt mit e me Maie zuegwungge und s Volk isch nur no zue uns aahne gströhmt und het sich vo däm Knischtere aastegge loh (es lauft mer hüt no yyskalt dr Rugge derab, wenn ich dra zrugg dängg). Es isch e wirgligs "Höhe-Liecht" gsi!
Noch em Nachtässe sin mir vo de Pfluderi zämme mit dr Junge Garde zum Barbara-Käller gässlet, wo mir denne au s "Pfluderi-Asyl" troffe hän. Au mit de Primidoofe hän mir uns dert verabreedet, do sie au bim "Monschter-Zug" mityygstande sin. Ich ha denne nit schlächt gstuunt, wo ich s Latärnli vo de Primidoofe vor em Kino Hollywood ha könne usmache und festgstellt ha, dass alli siebe in e re Einerkollone uf zue ko sin! Es isch e super Bild gsi und s Glächter isch mit em verpazte Haltemanöver natürlig perfäggt gsi. Uf jede Fall sin mir denne alli zämme yygstande und sind dur d Freye aabe zum Rothuus und vo derte isch dr Stamm ellai (natyrlig inkl. De Primidoofe) wyter in Käller vo unsere Waage-Frynde (an dere Stell e riese Danggerscheen fyr Eyri bewirtig). Vo derte sin mir denne wieder ellai wyter, doch hän mir uns denne fyr dr letschti Kehr vor em Gambrinus bis zum Ändstraich wieder troffe. Am Morge am 4i denne hän mir no mol dr "Colonel" gruesst und pfyffe und somit isch d Fasnacht 2004 laider scho wieder Vergangeheit gsi.
Mir sin denne no noch Pfluderi-Manier uf de Garniture vor em Schnabel gsässe und hän no mol uf e glungeni Fasnacht aagstosse.

Es isch e Fasnacht gsi, wo mir alli, egal od e Primidoofe oder e Pfluderi, nit e so schnäll wärde vergässe. Es isch eifach e super Sach gsi, mit Eych zämme derfe Fasnacht z mache!!!! Ich mecht mi do no mol bi allne Primidoofe fyr die tolli Zyt und Fryndschaft bedangge! Es isch glaub fyr uns alli am Aafang e biz e Abentür gsi, doch isch us däm Abentür e Fryndschaft entstande, wo mir sicherlig in Zuekunft wärde wyter pfläge!

In däm Sinn verblieb ich und ich fray mi jetzt scho wieder druff, wenn mir an e me Donnschtig am Morge noch de 4i oder noch em Bummelsunntig vor em Schnabel zämme sitzte, wenns wieder haisst "UND YYHNE STÄCHE, UMME SCHLOH; DUURE ZIEH UND AABELOH, ABELOOOOOOOOOOOOOOOHHHHHHHHHH!"

Author: Micha Wicki, Sujet-Obmaa, Pfluderi


 PS. Amergig vo dr Redaggtion: Danggscheen vyylmoll fiir dä tolli Bricht!!!!!