> Zurück

2009 - " Ehuffe Indianer - aber die letschte Mohikaner"

Ivan Minuz 01.01.2009

Sujet: "E huffe Indianer - aber die letschte Mohikaner"

Ich möcht mit mim Bricht frieh ahfoh. Aber nit bim Grund, wie-n-ich drzue kum, bi de Primidoofe drbi z'si, denn dä kenne die meischte. Nei, ich möcht mir dr Waagevernisage ahfoh. E tolle Ahlass, mit tolle Lüt, tollem Wätter und-eme mega geile Waage ! Mir hän uns am Samschtig frieh troffe und hän alles für's Glinge vo däre Yweihig vorbereitet. Zwei Mitglieder hänn die letschde Arbete im Käller erledigt und sin denn ebefalls uf Därwil go hälfe. Mir persönllig het die Vernissage sehr, sehr guet gfalle.

Am Mäntig denn, voller Vorfreud und mit übersteigerter Nervosität (eifach, dass es do au mol gseit isch), hän mir uns mitte in dr Nacht, AM ZWEI !!!!, im Käller troffe, hän öbbis kleins drunke, uf d'Fasnacht 2009 ahgstosse und au do nomol, alles für unseri Gäscht vorbereitet. Das heisst, vieli vo uns hän Sache für d'Källeröffnig vorbereitet. Dr Tömse allerdings het mit em Ofe gspiilt. Also gspiilt isch möglicherwiis dr falschi Usdrugg und ich due ihm e bitzeli Unrächt (sorry Götti !). Är het verzwiiflet versuecht das Ding heiss z'bekoh. Öbbe am zwanzig ab zwei het är ufgeh und dr Tömeli het d'Uskunft am Telefon kah damit mir dr Notfallelektriker könne bstelle. No bevor dr Elektriker s'Telefon het könne abneh, isch me uf d'Idee koh, dr Timer am Ofe uszschalte und plötzlig, us zur Zyt no unerklärlige Gründ isch au unsere Ofe warm worde… dr Tömse het scho lang gschwitzt. Also : d'Mählsuppe vom Phil isch ahgrüert und parat, dr Ofe für dr Tömse doch au no betriebsbereit, d'Tisch sin deggt, alles isch gmacht, dr Lehrling isch immerno nervös (ha nur nomol welle drah erinnere) es fehle nur no unseri Gäscht wo am 3 dörfe koh. Ah nei ! Unseri Waie und s'Brot fähle au no. Dr Pät stiggt us und muess hei go kuure, damit är am Cortège nit fählt. D'Gäscht kömme, d'Waie nonig. D'Stimmig sinkt liecht und Ahfäng vo Wuet macht sich breit. Teilne Lüt isch d'Rotlosigkeit ins Gsicht gschriibe : " was mache mir ohni Waie ? Was dängge unseri Gäscht. Verdammt do goht uns zimmlig Umsatz verlohre. ". Unseri Gäscht verlöh kurz vor de Vieri dr Käller, sie stöhn-y, es lüttet Vieri, s'liecht goht us, Morgestraich - vorwärts - Marsch ! Es isch Fasnacht ! Und dr Minu wird no nervöser ! Unsere Ysatz im Käller lauft guet. Es wird drunke und g'ässe. Waie gits keini und mir hän se us dr Lischte gstriche. Dr Waieliferant het vieli Übernäme bekoh und brucht sich glaub in unserem Käller nümmi lo bligge. Fertig, heim go vorbereite für nach Därwil zum Waage. Am zähni träffe mir uns wieder bim Waage, stosse nomol uf d'Fasnacht und unsere geile Waage ah, lade s'Material und ziehn s'Goschtüm ah. Scheisse gsehn mir guet us ! Alles parat, mir fahre nach Basel. Mir stelle uns in der Spiegelgass uf, lade s'Material für d'Binggis ab und stosse uf d'Fasnacht ah. Nit z'vergässe unsere Gascht us färne Länder. Als Entwickligshilfprojäkt entstande, hän mir Bsuech us Italie uf unserem Waage willkomme gheisse und au mit ihm ahgstosse. Es wird LANGSAM eins. Jede merkt, dass mir vermuetlig z'früeh nach Basel gfahre sin. Aber macht nüt ! Drfür längts no für e Wurscht und mir hän no Zyt, für zum uf d'Fasnacht ahzstosse. Kurz vor de zwei wärde letschdi Einzelheite mit de Pfluderi abgsproche. S'Material isch verteilt und jede isch ygrichtet. Dr Lehrling wird nervös, het kei Ahnig und luegt de andere ab, wie si sich yrichte. S'isch Zwei, mir fahre, unsere Bsuech, dr Patrizio, alias Luigi, hoggt uf em Kutscherbock, bim Minu verschwindet d'Nervosität und Panik macht sich breit : " scheisse, was kan-ich Schüüche Bueb all däne liebe Lüt unde an dr Stroos nur verzelle ? Die erwarte doch, dass dr Waggis us em Waage bäägt ! " Macht nüt. Alles kunnt guet. Au dr Minu schwätzt : " do hesch e Zwiibele ! mach emol e Waie ! " wär jo supper ! Jo, denn könnt me die nämlig grad in Käller bringe und de Gäscht nochträglich ahbiete… supper Idee eigentlig ! Dr Cortège lauft guet. S'Wätter isch nit eso toll. V.a. für die andere… mir hän jo e Dach. Am grosse Halt bi dr Mäss kömme vieli Passivi, Fründe, Familie, Bekannti. Au do wieder e super Sach ! Mir hän's wie immer glatt, stosse uf d'Fasnacht ah und schwätze öbbis. Es goht witter, via Clarastross Richtig Grossbasel. Vor em Dreikönig isch dr Cortège für uns fertig und mir hän ändlig Zyt, um uf d'Fasnacht ahzstosse. Unsere Kutscher bedankt sich härzlig, freut sich uf d'Wiederholig am Mittwuch und goht. Mir sin elaige und stosse uf d'Fasnacht ah. Denn : Primidoofe - Ystoh - vorwärts - Marsch ! Mir laufe in Formation in Käller. Vorus d'Latärne und d'Fahne. Im Käller wärde mir härzlig Willkomme g'heisse und mir stosse uf d'Fasnacht ah. Vier oder fünf mol… ich weiss es wirklig nüm. Es goht mit erlichtertem Koschtüm zum Elsabethestüübli wo uns e herligs Menu erwartet. Mir stosse uf d'Fasnacht ah (Phil : danke für d'Getränk !), gniesse d'Rueh nach em Stress vom Cortège und hän Zyt und Platz für zum plaudere. Am Elfi laufe d'Pfluderi am Noodlebärg ab. Mir hätte vorgseh, mit ihne e bitzeli Vortrab z'mache. Ohni Formation laufe mir gschwind zum Käller und hän kei Zyt zum uf d'Fasnacht ahstosse (so e Stress !). Neui Mäldig vo de Pluderi : mir träffe uns bi dr Haaseburg. Mir laufe au dört ahne und warte uf d'Pfluderi. Die Zyt wo mir hän, nutze mir und stosse uf d'Fasnacht ah ! d'Pfluderi kömme und mache Pause ( ?). Die wo no möge stosse nomol uf öbber ah. Und denn, mir mitte unter de Pfluderi. Zwüsche Vortrab und Spiil. Mit Latärne und Fahne laufe mir gmeinsam, begleitet vo Piccolo kläng und Drummel streich, uf Umwäge in d'Schnabelgass. D'Pfluderi mache dört fertig. Mi Nervosität han i definitiv überwunde und bi nur no erschöpft (isch voll Ahsträngend, Fasnacht mache !). Voller Schaam, verkünd-i, dass ich gärn Heim will. Unterwürfig gib-i allne d'Hand, verabschied mi vo allne und vom Fasnachtsmäntig, bedank mich bi de Primidoofe Basel für die tolli Erfahrig wo si mir ermögligt hän und gang ufs Taxi. Är fahrt mi ins Kleibasel won-i e luschtigi Party mit andere ha… nei, klar nit… ich bi überdurchschnittlich fescht glücklich, dass ich vor-em ins Bett goh s'ganze Goschtüm uszoge ha. Ich glaub drei-e-halb Minute nach däm ich zur Türe yhne koh bi, han-i gschlofe. Göttlich ! Jetzt hock ich do, los mi aller-erschte Fasnachtsmäntig als aktive Fasnächtler Revue passiere und bi dr Meinig : alles geili Sieche, die Primidoofe. Ich freu mich uf dr Zischtig und uf jede Momänt mit de Primidoofe. Nervosität stellt sich wieder y… es stoht jo no e Prüefig bevor…

Zischtig ! Nache-eme bitzeli Schloof hän mir uns mit de Binggis in dr Spiegelgass troffe. Am halber zwei am Nomidaag sin mir denn au los g'loffe. En erschti langi Rundi bis in d'Falknerstroos wo mir wieder mit Familie, Fründe und Bekannte ahgstosse hän - diesmol uf dr Nochwuggs. Dr zweiti Teil het uns denn bis vor s'Dreikönig brocht. Die Kleinschte vo uns Grosse sin ächt zum frässe gsi in de Wäägeli. Und wie sich's für e Waggsiwägeli g'hört, hän sie verteilt was es geh het und mit-eme verschmitzte Lächle sin d'Bsuecher gstopft worde. Mit de Binggis und de Mamis, zmindescht die wo hän könne und welle mit uns Spyyse, sin mir in d'Mägd. Mir acht schöne aktive sin separat, mit-eme Sicherheitsabschtand zum Räschte, im Sääli gsässe. Glyy isch d'Servierdüüse koh und het welle wüsse was mir wänn ässe und trinke. Das isch dr letschti Momänt an der Fasnacht 2009 gsi, won ich sälber ha dörfe wünsche, was ich trink (ok, am Mittwuch hets denn besseret und mini Entscheid sin wieder respektiert worde). Dr Obmaa het verkündet, dass hüt mi Prüefigsdaag isch und dr erschti Teil no do in dr Mägd stattfinde wird. Nach em feine z'Nacht isch es denn los gange. Ich ha müesse e dreier Bier, e dreier Milch (Laktosefrei, wäg mim Problem), e Ei und e Meringue trinke bzw. Ässe. Ich muess no ergänze, dass das Ei roh gsi isch und ALLES wäg het müesse, inkl. Schaale. Die Prüeffig het mich natürlig erwartgsgmäss kalt gloh. In einere Rueh und mit der nötige Glasseheit han ich das Züg wägputzt. Gar kei Problem für mich. Obwohl ich scho glaub, dass mini Verdauigsstörige vom Mittwuch, Donnschtig, Fryttig und em Samschtig uf das zruggzfüere sin. Egal, wär e Primidoof will si, kennt kei Schmärz und git alles für d'Gmeinschaft ! Mit-eme eigenartige Gfühl im Maage sin mir denn in Käller trottet. Und mir hän guet usgseh im Stammgoschtüm ! Denn, im Käller hän mir d'Mannschaft vo dr Nomidaagsschicht abglöst und hän der Källerdienscht übernoh. Ich ha mich uf dä Ysatz gfreut, bis mir dr Obmaa die gueti Stimmig in mir inne versaut het und die zweiti Ufgob stellt het. Acht BH's het dä Luschtmolch welle. Zyt han i bekoh bis zum Ändi vo unserer Schicht. Mi Höhli het mir für das dr richtig Schutz botte. Dört ahne han-i-mi verkroche und e kleini Reed, ok, me so e Ahspröchli, vorbereitet. Mi muet und dä vo minere zweite Persönligkeit han i zäme trummlet, bi vor d'Masse im Käller ahneträttet und ha zu'ne gsproche. D'Masse hän tobt und d'BH's sin nur so gfloge. Kasch dänke Näägeli ! Kei Sau hets interessiert ! Nur mit dr Unterstützig vom Obmaa (viellicht doch s'schlächte Gwüsse ?) bin ich zu mim erschte BH koh. Und es sich es guets Gfühl gsi. No dis no bin ich wieder vor die mir total fremde Lüt ahnegstande, ha zunene gschwätzt zum se motiviere e Teil vo sich hänge z'loh und mich bi minere Prüefig z'unterstütze. G'holfe hets im erschte Augeblick nit. Aber denn plötzlich han ich nüün BH in allne Grösse und Variante kah. Dr Obmaa isch z'friede gsi, ich erliechtert, die andere Primidoofe bsoffe (nei, nei, aber s'het grad so guet passt !) und bi nüün Fraue het um dr Buuse umme ungwöhligi Freiheit ygstellt. Alles in Allem sin alli glücklig und z'fride gsi. Unsere Dienscht im Käller isch, begleitet vo 16 Bänk ( !!) umme gange und mir sin richtig Klaibasel däppelet. Obligati " Öpfeli " hän uns erwartet. Mir hän se trunke - e Teil mit Gnuss, dr anderi Teil doch eher mit Gruus. Ganz im Zeiche vo de Gugge sin mir bis zum Fürobe im Klaibasel bliibe. Wo mir dr Käller hän welle go schliesse, het uns e bsunders Bouquet erwartet : d'Improvisante hän uf uns gwartet und hän bi unserem Yträffe grad losgleggt. E ganz e tolli Gugge het uns und unseri Gäscht mit supper Musik unterhalte und zum Tanze animiert. Denn hän mir Füürobe gmacht und sin heim (ämel die meischte… gäll Flip !). Ich ha usgrächnet und bi uf sehr, sehr wenig Schloof koh, bis zu unserem näggschte Träff am punkt zähni. Und es isch einige e grosses Ahlige gsi, dass me sich scho am zähni trifft !!!!!

Won-ich am Mittwuch Morge, kurz nach de zähni am Waageplatz ahkoh bi, bin-ich nur vo unserem Fahrer begrüesst worde. Dr Alex het scho au e bitzeli gstuunt, dass no niemer dört gsi isch. Me het au ihm gseit ka, dass mir us Zytgründ scho am zähni müen dört si. Kurz vor de halber elfe sin denn alli dört gsi. So au s'Wurfmaterial für dr zweiti Cortège. Mit hän alles yglade und sin, teilwiis sehr, sehr erschöpft, mit em Waage an Märtplatz gfahre. E Wurscht oder zwei. E Nickerli oder zwei. Und scho sin d'Pfluderi hinter uns ygstande. Ab uf d'Route ! Die erschti Etappe isch sehr, sehr kurz gsi : Ysegass, Mittleri Brugg, Rhygass, Räbgass - Pause. Ich muess no sage, dass ab Rhygass keini Zueschauer an dr Stroos me gstande sin. D'Pause het aber guet do ! Mit hän öbbis trunke und plauderet. Denn isch es bi guetem Wätter (me isch jo nümmi ahspruchsvoll) witter bis zum grosse Halt gange. Analog em Mäntig hätte uns unseri Passive, Familie und Fründe dört sölle träffe. Aber mir sin einiges vor em Plan (mindischtens 30 Minute !) gsi. Bis zum Schluss hän mir doch no alli könne mit Getränk versorge. Denn, die aller letschdi Etappe vo minere aller erschte Fasnacht mit minere aller liebschte Waageclique. Über d'Wettschtaibrugg, füüre zum Bankeplatz und abe zum Barfi bis zur Falknerstroos. Dört isch fertig gsi. E emotional ergriffends Ständli vo de Pfluderi het für uns s'Ändi vom Cortège bedütet. E Apéröli vor em Znacht. Denn sin mir mit em Waage bis in d'Spiegelgass, wo mir alles parat gmacht hän, damit unsere Fahrer dr Waage zrugg nach Schönebuech ka fahre. Är isch elaige gange, will dr liebi Silvio ihm g'holfe het, dr Waage ordentlig z'versorge. Danke euch beide ! Mir sin denn in Käller go Sali sage und denn ins Elsbethestüübli go ässe. Fein isch es gsi, sehr sogar. Aber e sau Hitz in däre Beiz, das glaubsch gar nit. Uf jedefall sin mir durch unser Menü gfüert worde. Am Schluss no Schnäbsli und zrugg in Käller go Latärne und Fahne hole. Vor em Roothuus hän mir d'Pfluderi wieder troffe und sin bis ca. am eins am Morge mit ihne im Vortrab gloffe. Denn e Stündli zur freie Verfüegig. Einigi sin in Käller mit de Pfluderi, anderi sin s'Konzärtli vo de Amazone und de Krachsynfoniker go lose, anderi wiederum wüsse mir nit, wo si ahne sin… Alli zäme hän mir denn dr Käller gschlosse und s'nötigschte ufgrumt. Vo drei bis vier sin mir denn wieder im Räge stande und hän die lätschde Kläng vor dr Fasnacht 2009 gnosse und uf uns lo wirke. Am vieri denn, dr Ändstraich vo de Pfluderi. Obligat : d'Pfifferdagwach. Im Ahschluss nur für uns : d Drummlerdagwach vo einige Drummler vo de Pfluderi. Alles in Allem dr krönend Abschluss von-ere ganz, ganz geile Fasnacht.

Ich dank de Primidoofe, minere Frau und allne BH-lose Fraue. De Primidoofe für ihri Fründschaft, d'Fasnacht, s'Bier, dr Milch, em Meringue und em Ei. Minere Frau für … das weiss ich und mi Frau. De andere Fraue für ihri Unterstützig und ihri BH's (what a feeling !). Es isch wirklig e total gueti Zyt gsi und ich empfiehl jedem, wo das au will, sich z'mälde. Es wär e Schand, wenn me das würd verpasse !