> Zurück

2010 - "Piraterhyy uf em Rhyy"

Philipp Barmettler 01.01.2010

Sujet: "Piraterhyy uf em Rhyy"

Fasnachtsmäntig

Morgestraich, vorwärts, Marsch! Es isch wiedermol sowitt: wie jedes Joor Punkt vieri gönn in dr ganze Stadt dLiechter ab, dLatärne erlüchte, Drummler und dPfiffer gänn ihres beschte. Und au das Joor dörfe mir, dPrimidoofe, wieder e Teil vo dr Fasnacht 2010 si. Mir hänn uns alli zämme e weneli friehner im Käller troffe, um die letschte Vorbereitige füre Morgestraich zträffe. Das mol hämmer uffd Waie nit miesse verzichte und au dr Pät het si Durchfall chönne deheime lo. Drfür sinn in dr Kuchi dSicherige vom Liecht usegheit. Uss wellem Grund au immer, aber mir hänns in kurzer Zit wieder anebecho. Au das Joor simmer Punkt vieri eimol meh nit vom Räge verschont bliebe. Das het aber dr Stimmig im Hiblick uffd Fasnacht 2010 kei Abbruch do. Wo denn die erschte Gäscht im Käller itrudlet sind, het sich denn au dAspannig bim einte oder andere afo löse. Und trotz em nit so tolle Wätter isches unterem Strich e lässige Morgestraich gsi. Denn isches dusse au scho langsam hell worde und uff die viertel ab sächsi, halb siebni hämmer dr Käller chönne schliesse. Mir hänn uns langsam uffe Heimwäg gmacht zum no e chleins Erholigspfüüsi chönne mache fürs grosse Highlight am Nomidaag am zwei, dr Cortège.

Vorem grosse Highlight hämmer aber zerscht no unsere superschöne Wage miesse lade. Für das hämmer uns am zähni in Therwil bi dr Free Mobil (em Phippe si Gschäft), wo mr am Samschtig vorhär au scho dWagevernissage gha hänn, troffe. Nochdäm mir denn dr Wage glade und alli sGoschtüm montiert hänn, ha ich sGfühl gha, jetz stoht uns nüt meh im Wäg füre glatti Fasnacht. Doch denn isches fuschtdick cho: I hammi doch nit chönne drugge und dr Pippo und ich hänn das besch*** L uffe Rugge montiert griegt. Aschliessend simmer alli zämme gschlosse uffs Trämli gange und richtig Stadt inegfahre. Nochdäm mir in dr Stadt acho sinn, und sKribble langsam agfange het, simmer no schnäll e Kleinigkeit go ässe und öppis go trinke. Und pünktlich uff die halb zwei hets denn au scho gheisse „Larve azieh, e schöni Fasnacht zämme!“. Nachem Start am Picassoplatz hämmer e langi Strecki gha bis kurz vorem Mässeplatz, wo die erschti Pause gsi isch. In dr erschte Pause het me unterenander scho ghört, dass dLütt begeischteret sinn vo unserem Wage. Sie heige gschtuunt und dr Wage mit grosse Auge agluegt. Au uffem Wäg zu dr nägschte Pause ind Klybeckstrooss hänn sich dMeinige zu unserem Wage nit gänderet. Nochem zweite Halt isches denn au scho wieder witter gange richtig Grossbasel. Sozage „ab übere Bach!“, wo bim Spiegelhof die nägschti Pause uff uns gwartet het. Uffem Wäg dörte ane, het me sich anhand vo dr Zit leider scho mitem Gedangge miesse befasse, dass dä Cortège gar nümme so lang goht.... Jetz wo mr im Spiegelhof acho sinn, und mr uns dr grosse Pause hänn chönne widme, het me sich über seint oder andere, wo bis jetz eso uffem Wage abgange isch, chönne unterhalte und sganze au e chli sagge lo. Was mir persönlich für dr letschti Teil vom Cortège nomol e zuesätzlichi Motivation geh het. Am zwanzig ab vieri isches denn au scho wieder sowitt gsi und es het gheisse „Larve a!“. Uffem Wäg an Barfi ane (i weiss zwar nit wie's letscht Joor gsi isch) hets uns nit an Wurfmaterial gfählt. Ich für mi Teil cha nur sage, i ha bis dört ane no gnueg Material gha und ha aber vorhär nit wenig usegäh. Uff jede Fall simmer am Barfi vrbi cho und me isch langsam aber sicher uffd Zielgrade Aeschevorstadt cho.

Jetz am viertel ab sächsi isches Tatsach: Dr Cortège am Mäntig vo dr Fasnacht 2010 isch Gschicht! I hoff dä Cortège bliebt mir und au allne andere Primidoofe schön und lang in Erinnerig. Aber fertig in Erinnerige gschwelgt! Bevor mir hänn chönne go Znachtässe, hämmer no zwei, drei anderi Sache zerledige gha. Serschte wär gsi, dr Wage zruggbringe, wo mr dangg em Minu sine Abklärige hinterem Züüghuus im Industriegebiet hänn dörfe anestelle. Das het dr Alex, dr Fahrer, dr Reto und ich in Agriff gno. Dr Räscht vo dr Clique isch in Privéekäller dr eint oder ander schomol go neh. E gueti dreiviertelstund spöter sinn denn au dr Reto und ich drzue gschtosse, wo's scho feuchtfröhlich zue und här gange isch. Nachem Apéro simmer denn irgendwenn emol go Znachtässe. Gässe hämmer im Elsbethestüübli, wo's em eine oder andere nümm so wohl isch gsi – gäll Pit?. SÄsse het dört glaub jedem gschmeggt. Es het gwüssi Persone am Tisch geh, und mit „gwüssi Persone“ meini eigentlich nur eini, die hänn uff eimol e chli wenig Fleisch uffem Täller gha! Nochem Ässe het me denn langsam gmerkt, dass bi gwüssne vo uns e weneli dLuft dusse isch. Das chame au niemerem verüble, denn inkl. em Morgestraich isches e sehr e lange, aber au e sehr e schöne Daag gsi! Wo denn au die letschte mitem Mineral und em Kaffi fertig gsi sinn, simmer uffbroche in unsere Käller. Wo mr im Käller acho sinn, hämmer notürlich no eine, zwei gno. Aber so wirklich fit isch keine meh gsi... Die einte sinn im Käller bliebe, die andere no e Huus witter und gwüssi sogar hei. Und wo denn spöter dGlogge dreimol gschlage het, isch denn au bim letschte vo uns sLiecht abgange und mir hänn dr Käller, zruggblickend uffe tolle Start am Morgestraich, e intensive und tolle Nomidaag und eme gmietliche Obe, mit guetem Gwüsse chönne schliesse...

Autor: Päsci

Fasnachtszyschtig

Am Zyschtig isch erscht mol ussschlofe agseit gsi. Gege diä eins hämmer uns mit de Binggis bim Spiägelhof troffe. Nachdäm mir komplett gsi sin, het sich dr Tömse ufs Zugfahrzüg gschwunge und dr Räscht vo uns isch näbe de Kinderwägeli mitgloffe. Ufgrund vom afänglich schlächte Wätter sin mir fascht diä einzige gsi wo am halb zwei Kinderfasnacht gmacht hän. Jänu was solls, de Kleine hets gfalle. Nachdäm mir den bim Stadtcasino diä erscht Pause kah hän, hets langsam Lüt gäh in dr Stadt. Mir hän den no ä Rundi umme Barfi gmacht und sin den via Falknerstroos zum Märtplatz wieterzooge. Bim drei König hämmer den d Kindetfasnacht beändet. Go ässe simmer in Lällekönig.

Nachem Ässe het den scho gli unseri Schicht im Käller agfange. Nachdäm dr Waggismarsch an uns verbi zoge isch hämmer uns uffe Wäg in Richtig Martinsgass gmacht. Wirklich vill z tue hämmer nit kah. Mir hän sovill freiwilligi Hälfer kah, dass mir meh Dekoration gsi sin. S Volk isch nur so in unsere Käller gströömt. Innert kürzischter Zyyt het sich ä langi Schlange uf dr Stäge bildet. Plötzlich het ein vo uns gseit “Hey Alte, duss uf dr Stäge warte dr P* sit 20 Minute!!“ Und tatsächlich dr P* het gwartet und het den au gsunge. Är isch an däm Oobe nit dr einzig gsi. Ä mänge Bangg het dr Wäg zu uns in Käller gfunde.

Um Mitternacht hets den gheisse ab an Claraplatz. Nach a paar Öpfelirundene vorem Schieffe Egg simmer wieter zoge in Baggestoos. Well ich den uf diä drei am Morgä mit paarne bi dr Käller go zuemache ändet leider d Brichterstattig vo mir an däm Punkt. Was in dere Nacht sunscht no so alles passiärt isch und wär bi wäm z Morgä gässe het, wüsse leider nur wenigi J

Autor: Pippo

Fasnachtsmittwuch

Los gange ischs am Mittwuchmorgä für diä meischte am zähni. Dr eint oder anderi het do no zimlich chleini Äugli kah. Nit alli häns aber pünklich ins Züghuus gschafft und hän via Handy mitteile lo, dass si no ä halb Stund bruche zum dusche (Merci für d Rundi Minu!!). Nachdäm mr alles Wurfmaterial uffem Waage deponiärt kah händ, simmer den au scho gli losgfahre in Richtig Brunngässli. Chuum acho isch au scho d Schmiir dört gstande und het unsere Waage uf Härz und Niäre überprüeft. Alles in Ordnig ischs Fazit gsi und em Cortège isch nüt meh im Wäg gstande. Gege diä halb zwei het den dr Alex dr Traktor gstartet und mir sin Richtig Wettsteibrugg gfahre. Rasch am Comité verbi und via Wettsteiplatz zur Mäss wo mr den au scho ä wohlverdiänti Pause iglegt hän. Nach kurzem Halt hämmer uns uffe Wäg zur Spiägelgass gmacht wo Familiä, Fründe und Passivi scho uf uns gwartet hän. Meh het zämme gschwätz und eine gno. Aschliässend hämmer uns nomol usgrüstet mit Blueme und hän dr räscht vom Cortège in Agriff gno. Bis zum Aescheplatz simmer fascht alles Wurfmaterial losworde und was mr no uffem Waage kah hän, het spötischtens dört ä “dankbare Abnähmer“ gfunde. Ich glaub es git hüt no irgendwo ähne am Rhy Öpfelwäihe.

Dr Cortège isch verbi und dr Waage isch bäserein gwüscht gsi. Plötzlich isch de “alte“ Primidoofe in Sinn cho, dass dr Päsci und ich (Anm. der Red.: dr Pippo) jo no gar kei Prüefig kah hän. Also het meh uns kurzerhand vom Waage verbannt und ä Kriägsrot iberuefe. Nach einiger Zit het meh uns den gholt und dr Phil het uns mitteilt, dass mir bis nachem Ässe Zit hän ä Schnitzelbangg uf d Bei z stelle mit folgende Bedingige: jede mues ä Värs (oder zämme zwei) singe, mir müen ä Helge und ä Instrumänt drbi ha!! Jawohl han i dänkt, das han i doch scho immer mol welle mache, wägge däm mach ich jo au Fasnacht uffeme Waage. Tief in Gedanke versungge sin den dr Päsci und ich Richtig Käller trottet. Dr Räscht isch natürlich au mitcho. Merci Minu fürs Waage zruckbringe!! Im Käller hämmer uns mit Stift, Scherr und Schnurr bewaffnet und hän uns an d Arbet gmacht. Es isch nur harzig vorwärts gange. Vorallem wo kriäge mir ä Instrumänt här und wär vo uns spiilt drmit?!?! Ä Telefon deheim het gnüegt und mini Holdi het uns ä Gitarre in Käller brocht. Aschliässend simmer alli zämme ins Elsbethestüübli go zNacht ässe. S Ässe isch tiptop gsi und alli häns luschtig kah usser zwei. Dr Uftritt isch immer nöcher koh und fertig simmer no lang nit gsi – Helge moole, wiä wämmer heisse, wär singt was…

Als wär das nit scho gnueg gsi, isch em Päsci und mir den au no “s Dessert“ serviärt worde. I gang do nüm nöcher druf i, aber dr Eierschaale het scho bits kratzt im Hals. Mittlerwiile isch es kurz vor de elfe gsi und mir sin wider zruck in Käller.

Jetzt ischs sowit gsi. S Highlight vo dr Fasnacht 2010!! Ä Ereignis wo d Wält so no niäh gseh het!! Dr Uftritt vo de Primideppe. Dr Päsci isch dr Helgeträger gsi und ich ha d Gitarre untere Arm gno. Dr Käller isch voll gsi und alli hän dänkt was sin den das für zwei Halbschüeh wo do abe chömme. Ich glaub meh het uns ufgrund vo de Augemäsggli nit grad erkennt!! Dr erschtig Helge isch zeigt worde und d Gitarre isch gstimmt gsi. Los gohts…Ä zwei…

Mir sin ä neue Schnitzelbangg.
Entstande sin mir us primidoofer Hand.
Und glaubet uns es isch kei Witz.
Mir zwei sin s Bescht wos je hets gits.
Vor wenige Stunde hets gheisse Dir müend singe.
Do hämmer dänkt, nei dä könne Dir nit bringe.
Doch jetzt stömmer do und sin drbi.
Den liäber ä Primidoof als Ziircher si.
Mir hätte zimlig grosses Verständnis
Und wurdes au voll und ganz verstoh
Wenn ihr nach däm Uftritt do,
näkscht Joor nüm wurdet in dä Käller koh
Unseri Ufnahmeprüefig het bestande us däm Bangg.
Mir sage Charly, Tömse, Pit, Flip, Phil, Tömeli, Pät und Minu viile Dangg.
Ihr sind halt scho ä glatte Verein.
Mir hän jetzt fertig und nähme no ein.

So Pflicht erfüllt und jetzt schnäll ussem Käller verschwinde. D Mängi het tobt und dr eint oder anderi het sogar no meh welle höre. Uf dr Stäge het scho dr näkschti Bangg gwartet und isch vo dr guete Stimmig im Käller richtig erstuunt gsi. Leider sin scho diä letschte Stunde vo dr Fasnacht abroche gsi. Mir hän uns nomol uffe Wäg Richtig Innestadt gmacht und hän bimmene Biärli de Gugge und Clique zuegloost wo an uns verbi zooge sin. Am halb drei hämmer den im Käller langsam agfange mit ufruume. Für dr Ändstreich simmer zum Rümelinsplatz gange und hän dört no de Pfluderi zuegloost. Den isch plötzlich vieri gsi und d Fasnacht, so schnäll wiä si cho isch, isch si au scho wieder verbi gsi. Es isch ä wunderbari Fasnacht gsi. Merci villmol Primidoofe!!