> Zurück

2011 - "Die haili Wält isch verbyy - die Beese keere yy"

Thomas Steiner 01.01.2011

Sujet: "Die haili Wält isch verbyy - die Beese keere yy"

E glungene Wagebau mit e‘me tolle Yysatz vo jedem Aktive het zem Ergäbnis gfiert, dass mr mit e‘me scheene Schwyzerhyysli (Chalet) uff d’Route göhn….
Dr Morgestraich isch aimol meh, bäumig gloffe. D’Gäscht hän Hunger und Durscht gha und e mänge Däller Suppe, Kääs oder Zyybelewaie isch yyber d’Theeke gange….
Glyy druff, am Meentig-Nommidaag, sin mir parat gsi fyr unsere grosse Uffdritt. Dr Wage glade, alles parat und e jede verpflägt. Dr Meentigs-Cortége het also könne los goh! Bi Sunneschyyn und gueter Stimmig hän mir unseri Yywärmrundi yber d’Wettstaibrugg gha und am Riechering unsere erschte Halt gmacht. S’Chaos isch denn scho losgange, wo mr wyter sind. Immer dichter sind d’Zueschauer an dr Stroos gstande und scho dr erschti Stau het sich abzaichnet. Aber irgendwenn, sind au mir bim Comité ahko. Dr Pät isch ab em Wage go d’Zugsblaggedde hole. Er isch diräkt zem‘ene Comité-Mitglied gloffe (s’isch glaub dr Urs Weiss gsi) und het ihn ahgstrahlt als hät er grad dr erscht Pryys an‘ere Tombola gwunne. Dr Gipfel isch gsi, dass er derby dr Kopf abzooge het!!! ? Jä nu, d’Blaggedde het’s trotzdäm geh und d’Fahrt isch wyter gange…
Nach ere wytere glaine Pause sin mir diräkt yber die Mittleri Brugg an Wagehalt gfahre. Wie immer sin mir vo tausige Fäns erwartet worde!
Nach‘eme Umdrunk mit unsere Ahghörige und Gäscht isch‘s au scho wieder wytergange. S’Wätter het möge hebe und am Märtblatz, am Barfi und in dr Staine het’s gopferdeggel Lyt gha, mr sind fascht nit noocheko mit Schnuure und Bliemli verdeile. S’isch also nur langsam vorwärts gange bis mir am Äscheblatz ahko sind. Nach e‘me Apérööli im Privé-Käller isch denn s’Ässe uf em Programm gstande wo traditionell im Elsbethestübli stattgfunde het.

Mit gfüllte Ränze hän mir uns uffgmacht und sind in Käller go luege ob’s yberhaupt Gäscht het. Me het dr aint oder ander gnoh und je spöter worde isch, desto mieder sin die ainzelne Gsichter worde. Nodisnoo isch aine heim go pfuuse, denn die stränge Dääg sin jo erscht no ko…
Dr Zyschtig isch wieder ganz dr Daag vo de Gnepf gsi. Pünktlig het me sich an dr Spiegelgass droffe und isch mit de Kinder uff d’Route. Scho gli noch dr Pause hän sie kai Material gha und zu allem Ärger sin mr aimol meh im Stau gstande. D’Wahl, durch d’Rüdegass yber d’Freie Stroos z’fahre, het sich als Geduldsspiel abzaichnet. Am Märtblatz het halt e jede welle in d’Kamere vom Tele-Basel gnaisse. Egal, mr sind letschtlig duure ko und hän wie gwohnt am Bluemerain Schluss gmacht. Im Ahschluss het’s denn ebbis feins zem Ässe geh im Restaurant Schmiedehof und pünktlig uf die Siebeni, sin mir fyr unsere Yysatz parat gstande. Dr Käller isch gstosse voll gsi und so langsam sind die erschte Schnitzelbängg ko. S’Gstürm wäg em Rauche het’s au nit geh. D’Gäscht sind brav an de Tischli gsässe und hän de Bängg zuegloost.
Plötzlig isch scho wieder zwölfi gsi und dr Abmarsch in Richtig Glaibasel isch bevorgschtande. Vor‘ em schiefe Egg hän mir wie immer unseri Öpfeli verhaftet.(? = Bekanntlig hän das jo nit Alli gärn!!!) Mit‘ere gwüsse Betriebstemperatur isch‘s denn wytergange in Baggestooss wo mr denn hogge blyybe sin (?). Nach etliche Gudi-Gudi und Pfööl, isch denn für die meischte (nit für Alli!!!) au Schluss gsi und me isch Haim ins warme Bettli….
Fyr dr Mittwuch het s’Wätter laider nit so rosig usgseh. Am Ahfang isch zwar no guet gsi aber je spöter worde isch, desto meh und meh het’s zuegmacht und au e paar Räägedropfe sind vom Himmel gfalle.

Mr sind wieder die glyychi Route gstartet und diräkt ins Glaibasel gfahre.
Nach em Päuseli am Riechering isch’s wyter durch d’Clarastrooss wo mr wieder Dütschkurs geh hänn. E Strecki, wo mr alli nit so gärn hänn, aber was soll’s. Uff dr mittlere Brugg het’s schön Publikum gha was denn dr Stimmig guet do het. Dr Fän-Club isch au wieder an dr Spiegelgass parat gstande. Mamme, Babbe, Unggle, Tante, Schweschter, Götti, Nochber, Frau und wer au immer hän mit uns aine drunke. E Gugge het sogar no fyr uns e Ständeli gspiielt (Merci noomol) und pünktlig wo mr wyter hän welle, het’s ahgfange Saiche! S’het sich zem Glück no in Gränze ghalte, denn d‘Zueschauer sind no immer in Schare am Stroosserand gstande. Mr hän wie immer alles geh. S’Horn isch gloffe und d’Rätschene sind im Daueryysatz gsi. Mr hän intrigiert, dumm g‘schnuurt, Bliemli und Siessigkaite verdailt was gange isch.
Am Äscheblatz obe, nach em Wageputze, sin denn d’Vorberaitige fyr s’Nachtässe gloffe. Dr Minu het fyr uns e Fondue organisiert. E mega-gmietligi-Sach isch’s denn worde mit däm Fondue und met het gseh, dass eso Sache unhaimlig dien zämmeschweisse!
Nohär isch‘s denn wieder in Käller gange und mr hän au no e weeneli bi dr Hauptboscht, de Gugge und Glygge bym Gässle zuegluegt.
Uff die halb zwölfi het denn dr Minu fyr e Yberraschig gsorgt. Träffpunkt isch bym Spalebrunne gsi und ahschliessend isch’s denn in private Käller vom Remo Czerwenka gange. Deert het’s belegti Breetli und e Umdrunk geh und pünktlig uff die Zwölfi, isch uff e Minu sy Geburtsdaag ahgstosse worde. E tolli Idee gsi, denn dusse het’s gsaicht was es abe het möge!
Mr sind denn gschlosse noomol e bitz go luege wie gässlet worde isch und gäge dr Ändstraich, hän mir unseri Plätz yygno vor em Restaurant Schnabel und uff d‘Pfluderi gwartet. S’isch immer wie früscher worde und d’Miedigkait het me uns dütlig ahgseh. I dänk es sind alli froh gsi, dass me haim ins Bett het könne. E letschte Marsch vo de Pfluderi und denn, Punkt Vieri het’s g’haisse: Adie Fasnacht 2011, scheen isch’s gsi!