> Zurück

2012 - Sujet: "Dr Unggle Säm macht kai gueti Falle will sy Beerse duet zerfalle Numme no Aine ka die Wallstryyt no rette s isch dr Chinees, wämmer wette!?!"

Peter Bürki 01.01.2012

Sujet: "Dr Unggle Säm macht kai gueti Falle
will sy Beerse duet zerfalle
Numme no Aine ka die Wallstryyt no rette
s isch dr Chinees, wämmer wette!?!"

Fasnacht der Rekorde…

 
D’ Fasnacht 2012 wird bi mir als „Fasnacht der Rekorde…“ in Erinnerig bliibe. So han ych dä Winter dr kältischt Waagebau ever erläbt. Am einte Samschtig hän mir in Schönebuech Temperature vo -19º C gmässe! Au e Wuche spöter isch es no derart kalt gsy, ass mir hän miesse d’ Farb im Wasserbad erhitze. Au d’ Unterlag wo mir hän welle striiche, hän mir mit eme Heissluftföön miesse ufwärme, so ass d’ Farb bim Striiche nit grad gfoore isch.
Ansunschte isch es bim Wagebau immer öppe s’ Glyche. Zem aine isch super-toll z’ gsee wie eppis Imposants entstoot und zem andere mien mir immer (mehr) mit Zytnot kämpfe. Mir nähme uns wie immer Besserig vor…
 
Dr Morgestraich isch für mi noch wie vor eppis vom Töllschte. D’ Vorfreud isch riesig, wenn ych d’ Blätzbumser-Jungs abhool und mir in d’ Stadt fahre, parkiere und zem Käller laufe. Denn dr Käller fertig vorbereite, e Gudi-Gudi oder zwei näh. Ganz speziell isch au die Stimmig wo vor de Vieri im Käller herrscht – so e Mischig us Miedigkeit und Vorfreud.
Faszierend wie allewyl: Am 04.20 h isch dr Käller leer, 10 Minute spöter mien d’ Lüüt uf dr Stääge aastoo (Rekord!).
 
Dr Waage laade in Däärwil isch halt au immer speziell: yystimme, yydringge…
 
Das Joor sind mir zem erschte Mol uf dr Wettstaibrugg losgfaare. Durch das hän mir friener in dr Stadt miesse syy. Scho kurz nach dr Sperrig vo dr Brugg hän mir unsre Waage druff zooge und und pinggtlig am halbi Zwai isch es losgange. Isch irgendwie komisch gsi, nach 50 m scho dr erscht Comité-Standplatz z’ passiere (Rekord!).
Am Cortège vom Mäntig isch s’ Zytgfüül verlore gange. Nach em Halt bim Claraplatz sin mir einfach nüm in d’ Route koo, well dört gar nüt meh gange isch. Eso sin mir vyyl z’ spoot zem grosse Halt vor em Spiegelhof koo (Rekord!). All unsri Lüt hän scho ganz ungeduldig gwartet. Well mir jo pünggtlig hän miesse abfaare, isch dä Halt kurz und hektisch gsy. Dr Räscht vom Mäntig isch wie allewyl gsy – Cortège fertig mache – uslaade – e paar in Käller – e paar göhn ain go näh (und riese e Seppi uffs Steisbei) – Nachtässe im Elsbethe-Stübli – an d Fasnacht (e jede so lang er mag…).
 
D’ Kinderfasnacht am Dsyschtig het e grossi Neuerig brocht. S’ erscht Mol het dr Minu derfe s’ Traktörli vo de Kinderwägeli faare. Er het das hammermässig souverän gmacht. Nach em Nachtässe hän mir d’ Familie verabschiedet und sin zem Dienscht in unsre Käller. Wie allewyyl hän vyyl mehr Lüt in Käller welle als das Platz hän, so ass d’ Schlange uf dr Stääge wiider lang gsy sind. Au bi de Bängg sin mir sehr beliebt, so ass es au bi dene zu Stau vor em Käller ko isch (Rekord!).
Kurz vor Mitternacht sin mir übere Jordan zu unserem traditionelle Halt vor em Schiefe Eck. Das Joor sind mir aber zimlig enttüscht worde. Obwool sie dert genau wüsse, ass mir kemme, hän sie nach öppe 4 Rundene kei Öpfeli mee kaa – e riese Skandal! I dängg, ass dodrmit die Tradition gstorbe isch und mir neggscht Joor e neye löön ufläbe!
 
Dr Mittwuche isch e wunderbare Daag worde. Worde, well er für mi nit eso toll agfange het. Ych ha am Dsyschtig Oobe Schmärze im lingge Oor bikoo. Am Mittwuche Morge sind die eso schlimm gsy, ass ych zemene Arzt gange bi, wo mir allerhand verschriebe het. In Zivil bin ych in d’ UAG, wo mir am Mittwuche dr Waage laade dien. Zu däm Zytpunggt han ych no dänggt, ass es wäge de Schmärze nüt wird mit em Cortège. Wo ych aber ghulfe ha dr Waage laade, hän d’ Medis afo wirgge. Also bin ych haim mi go umzieh und diräggt in d’ Stadt – zem Gligg! Es isch e wunderbare Nomidaag worde.
S’ Zytmänägemänt am Cortège hän mir vyyl besser im Griff kaa. Bereits am viertel vor Drey (Rekord!) sin mir bim Spiegelhof gsy und hän deswäge dr grossi Halt extrem usgiebig kenne gniesse. Höhepunggt isch sicher wiider das tolle Ständeli vo de Heuwänder gsy.
Dr gross Höhepunggt vo dr Fasnacht 2012 isch aber erscht nach em Schluss vom Cortège koo: Mir hän uff em Waage Fondue Chinoise gässe. Nomol vyyle Dangg em Pät und dr Anita fürs Organisiere. Obwohls zimlig äng gsy isch, hän mirs in volle Züüg gnosse – eifach dr Hammer! Bi scho gspannt uf’s Menü vo neggscht Joor.
Wo dr Waage denn wäg gsy isch, sind mir Käller go luege. Wie allewyyl hän zu däm Zytpunggt e huffe Aggtive s’ Bedürfnis bikoo, go Fasnacht luege und loose. So sin mir alli zämme fascht zwei Stund bi dr alte Hauptposcht gstande und hän em Triebe zuegluegt.
Das Joor hän e paar Aggtivi nit bi zem Schluss möge bliebe und hän d’ Fasnacht 2012 vorzytig beändet (Rekord!). Das han ych e bitzeli schaad gfunde, wobi ych’s au ka verstoo, wenn me nüm maag. Mir räschtliche Fünf sin nach em Käller schliesse vor e Schnabel zum trationelle Ändtraich bi de Pfluuderi. E letschte Höhepunggt bivors ufs Trämli heimwärts gange isch.
 
E Joor voller Rekörd - mol luege wie’s 2013 wird!