> Zurück

2014 - ?Alles harm(l)os oder was, hösch? Isch doch alles harm(l)os! Mit Harmos wirsch es, blööd - blööder am blöödschte.?

Philipp Barmettler 01.01.2014

Sujet: „Alles harm(l)os oder was, hösch? Isch doch alles harm(l)os! Mit Harmos wirsch es, blööd - blööder am blöödschte.“

Wagen: E harmonisiert’s Klasse-Zimmer
Waggis: Fünf bsunders schlaue Maitli und fünf bsunders dumme Buebe wo mien harmonisiert wärde!

Aggtivi: Flip Ivan Pät Pippo Pit Reto Phil Päsci Tömeli Tömse

Wie scho syt Afang vo unserem Käller träffe mir uns jewyls am zwai de Morge vorem Morgestraich in unserem scheene Clique-Käller. Au wenn's scho "bissniss äss iuschuel" isch, isch es trotzdäm e spezielle Momänt. In däm Joor het unser Jungkader de Alte welle e paar Böschteli strytig mache. Aber aigentlig gits jo gar nyd zem verschiebe. Die Böschte sin scho syt Joore vo de Glyche bsetzt. Dr Phil verbrennt sini Määlsuppe, dr Tömse verbrennt sini Ziibele- und Kääswaie und dr Pit isch ständig am Rauche anstatt Kaffi useloh. Dr Fässli isch wie immer au derby und duet uns mit Abwäsche, Abruume und so wyter kräftig unterstütze - er isch e liebe Bueb. :-) So um die Drey am Morge kömme denn scho die erschte Gescht. Es sinn das d'Kiirsibuebe und die Treue vo dr Käässchnitte. Kurz vor de Viere bewege mir uns denn use uf d'Gass und luege däm belüchtete Umestoh gspannt zue. Punggt Vieri löscht wie allewyl s'Liecht und die Pfyyfer und Tamboure lege mit em "Morgestraich"-Vorwärts-Marsch los. Es lauft aim grad kalt dr Rugge ab.

Nach 10 Minute göhn mir wieder in Käller und die erschte Gescht, jo d'Käässchnitte", sin bereits wieder do und möchte Kääs- und Ziibelewaie und Määlsuppe. Die isch au in däm Joor dr Hammer und wird mehrmols an däm Morge in de höggschte Tön globbt. So, Bursche, jetzt mol Rueh wäge der Suppe!

Am Säggsi lüte mir die "letschti Rundi" y und schliesse dr Käller am halb Siebeni. Nachdäm alles für die Nommidaag parat gmacht und alles ufgruumt worde isch, verlöön mir dr Käller uf die halb Achti. Dr Phil und Tömse dörfe e bitz länger lige bliibe (obwohl das besser gschriibe als gmacht isch), die andere träffe sich bim Flip bi dr Bude. Dört wird dr Wage glade, Kostümiert und e Vesper ygnoh. Mitem Tram fahre alli usser dr Reto in d'Stadt. Dört träffe sie dr Phil und Tömse wo scho gspannt uf dä super schöni Wage gwartet hänn.

Bi prächtigem Wätter wird no e glaini Stärkig ygno und s'ganze Material uspaggt und verstaut. In de Pültli hets nid wahnsinnig vyyl Platz und e jede weiss, dass es nid lang e so ordentlig dinne usseht. Mir wüsse nid wo aane mit all däm Wurfmaterial - es isch e Wahnsinn, und eigentlich au e Blödsinn. Obwohl mir das Joor weniger kauft hänn, hänn mir trotzdäm meh. Unter anderem au, will mir ca. 4500 Stoffhündli beko hänn. Öppe 1500 wärde mir an dere Fasnacht use gäh. Dr Räscht wird an de nägschte Fasnachte verteilt.

Am halb Zwei isch es losgange. Will mir nach dr Wettstaibrugg hänn miesse starte, hänn mir gmeint, mir könnte scho e erste Stau usloh. Aber es isch in dr Rieche-Strooss grad losgange mit Stau. Dorum sin mir denn grad wytergfahre bis ze der Kasärne. Dört hänn mir denn dr erst Halt gmacht. Wyter denn uf die Mittleri Brugg, natürlig immer schön in d'Kamera lächle und e guete Ydrugg bi dene wo uns prämiere dien, bim Restaurant Merian, für dr Priis vom goldige Räppli.

Bim grosse Halt hänn denn unseri Fän in grosse Schare gwartet. Nacheme Schwatz und eim oder zwie Glas Wysse oder eneme Fläschli Bier, sin mir denn in Richtig Aeschevorstadt zem fertig mache und dr Wage leere.

Nachem Wage leere sin mir denn uf die halb 9i Zobe ins Elsbethe-Stübli go ässe. Dr Tömse het Cordon-Blö mit Pommes bstellt! Wältklass. Merci Tömse!

Nachem Znacht sin mir denn no uf e Rundi Käller oder sunscht uf d'Gass. Die aint oder andere hänn sich ab de halb Zwölfi Znacht heim verabschiedet. Dr Tömse und dr Phil hänn dörfe dr Käller zuemache und sinn denn, zwar scho todmied, uf die halb Eins in Käller.

Vyyl Gescht hets nümme gha, aber es isch trozdäm no zfrieh gsi zem dr Käller scho zuemache. Eso hänn mir uns denn bi Rauche und Schwätze dusse uf dr Stäge d'Zyt lo vergo, bis..... . .... am halb Zwei denn d'Improvisante igloffe sin und dr Käller nomol g'roggt hänn. Em Reichmuth sini Handballer hänn gueti Stimmig gmacht und sin uf de Bängg tanzt, bis denn am halb Drey au d'Improvisante schlapp gmacht hänn und mir denn ändlig hänn könne dr Käller schliesse, putze, ufruhme und parat mache für dr Zischtig.

E wunderschöne Mäntig isch krönend abgschlosse worde und dr Tömse und dr Phil sin denn sehr mied am halb Vieri ins Bett gfalle.

Autor: Phil (für dr Minu)

 

Am Zyschtig nommitag hämmer uns mit unserne Binggis bim Spiegelhof troffe. Das Joor hämmer so viel Amäldige gha, das mir sicher vier Wäägeli hätte chönne fülle. Do mir aber nur zwei Wäägeli händ, hämmer leider nid alli wo welle händ chönne mitnä.

Uf dr Route händ den Binggis vollgas gä und nach de Gsichter händ sie Spass dra gha.

Nachem Nachtässe hämmer unserne Fraue und Kinder tschüss gseit und händ uns ufe Wäg Richtig Keller gmacht um unseri Schicht go übernä.

Dr Keller isch wie jedes Joor bumpe voll gsi und Lüt sind wieder agstande bis ins Höfli.

Nach dr Schicht hämmer uns ufe Wäg gmacht, bewaffnet mit Schotbächer und gnueg Berentzen Öpfeli (so gruuusig) zum Chäppelijoch. Dört acho, hämmer e Stümpli azündet und miteme sooooo feine Schöttli agstose.

Aschliessend simmer no im Glaibasel gsi und händ eifach Fasnacht gnosse.

Autor: Tömeli

 

Los gange ischs am Mittwuchmorgä wiä diä letschte Joor au im UAG Areal hinter em Züghuus. Es sin fascht alli pünktlich gsi. Alles wytere kah meh sich sälber zämme reime. Bim Waagelade hämmer mit Schrecke miesse feststelle, dass mir fascht keini Getränk meh hän für dr grossi Waagehalt. Am Mäntig isch halt au grad ä bits sehr durschtigs Wätter gsi. Unsere Getränkelieferant het uns aber nit im Stich glo und het uns blitzartig mit neuem „Stoff“ versorgt. Nachdäm alles verruumt gsi isch, hämmer uns mit unserem fahrende Klassezimmer ufe Wäg in Richtig Wettsteiplatz gmacht.

Dört het denn no ä kleins Fotoshooting gäh und pünktlich am halb Zwei simmer uf d Route. Wettsteiplatz – Mässeplatz – Clarastr. – Rotliechtviertel – Mittleri Brugg.

Bim Spiegelhof isch den unsere obligatorische grosse Halt cho. Zum Glück hämmer am Morgä dr Waage no mit Getränk ufmunitioniärt, denn s Wätter isch wieder ähnlich durschtig gsi wiä am Mäntig. D Heuwänder hän uns wieder ä Ständeli gspielt (Merci villmol) und meh het eine oder zwei mit dr Familiä und de Fründe gno.

Nachem Halt hän mr nomol unseri letschte Kräft mobilisiärt und hän dr letschti offizielle Teil von dr Fasnacht in Agriff gno. Bim Aescheplatz acho isch denn au diä Pflicht erfüllt gsi. Nachem Waageputze hän mr, wiäs eigentlich scho Tradition isch, uffem Waage z Nachtgässe. „Apéro riche“ oder eifacht divärsi Platte mit ä Huffe guete Sache.

Und scho sind diä letschte Stund abroche und meh isch eifacht no bits in dr Stadt oder in unserem Käller gsi.

Adie Fasnacht, bis näggscht Joor!