> Zurück

2015 - "Iir miend dusse blyybe"

Thomas Schubert 01.01.2015

Sujet: "Iir miend dusse blyybe"

Du glaubsch es nit,

die Baselbieter-Drampel mache nit mit.

Das finde mir nit glatt,

und fordere e baselbieter-freii Innestadt!

Mit dr neie Stadtmuure dien mir signalisiere,

ihr Baselbieter kenne do nimm spaziere!

Drum blyybet won iir sind,

iir mit eyrem sture Grind!

Waage: e abgschotteti Stadtmuure

Waggis: Stadtbewach-Waggis

Aggtivi: Pit, Pippo, Phil, Tömse, Minu, Charly, Pät, Tömeli, Päsci, Schubi

 

Zer Fasnacht 2015 hän die Primidoofe e Lehrling gfunde. Dr Schubi, dasch dä mit em „L“ uf em Kostüm, dr Grossmamme-Schregg ;-) , dr „Lehrling“ ebe. Dem Titel kunnt au z guet, dr Fasnachtsruggbligg z schriebe, was y an dere Stell sehr gern mache tue.

Zem Ruggbligg ghert natürlig au d Waagebauzyt, das würd aber z wyt fiere, drum beschrängg i mi uf d Waagevernissage & die drey scheenschte Dääg.

D'Vernissage vo unserer mobile Stadtmuure, het das Joor s erst mol in Blätzbums, bi dr Kochschuel am Samschtig vor dr Fasnacht stadtgfunde. Mir hän vieli Ehremitglieder, Passivi, Familie & Frinde derfe begriesse. Offiziell isch durch dr Pippo & dr Tömse denn unser Sujet präsentiert worde. Dr zue ahne hän die beide dr Pit geehrt, er het das Joor sini 20. Fasnacht mit de Primidoofe vor sich gha – härzliggi Gratulation! Jo und denn bin ich als Lehrling vorgstellt worde – e bitz rooti Ohre han i scho becho, aschliessend isch mittailt worde, ass dr Flip nimmi bi dr Primidoofe Clique mitmacht. I ha mir lo sage, är wurdi an dr GV no entsprächend gwürdiggt und verabschidet.

Dr Event het denn no drey witeri Höhepünggt gha, zum eine isch d’Vernissage musikalisch durch d’Fuege Fäger Basel 1964 umrahmt worde – das het gfäggt! Wyter hän mir dr Bangg d’Syydiane derfe begriesse, wo de Gäst e Kostproob vo ihrem Repertoire zum beschte geh hän – Dangge viel mol! Denn isch no dr Phil speziell z’erwähne, er het für s liibliche Wohl gsorgt und e feyns Staipilzrisotto fyr alli Gäst ahnezauberet – hmmm, feyn isch es gsi! Ajo, fascht vergässe – e perseenligi Würdigung het em Pippo sii „Gross“-Mamme becho, e feyns Cüpli, statt eme Hüchlerbäse. Gäll Doris, isch e guete Joorgang gsi?!?

Nach so vielne Ydrügg vo dr Vernissage bin y denn doch chli agspannter ins räschligge Weekend... Nümm lang und mini ersti Fasnacht fangt aa...

 

Die drey scheenschte Dääg hän wie allewyl frieh am zwei am Morge agfange mit em Källerdienst während em Morgestraich in unserem Primidoofe-Käller. Kaffi, Fertig, Lutz, Määlsuppe, Zibele & Kääswaie, Bleeterliwasser und no ganz viel mehr hän mir gmacht & unserne Gäst serviert. Vo drey bis halb siebeni sind mir do gsi fyr unseri Gäst. Drno hets gheisse, putze, uffülle, ruume und ab heime, go vorbereite.

 

Dr nögscht Träffpunggt isch bim Waage lade z Blätzbums gsi. Orange, Plüschtierli, Täfeli, Gummibärli, Röseli, Mimösli & ganz viel Gmiess hän mir glade, dr Waage het sich gfüllt und am Schluss no d’Räppli; wo ahne no mit dene? Denn schnell no e Imbiss mitenander gniesse und los gohts! S Kostüm e Waggislarve in Ritter Montuur mit Kettehemmli – sau geil, s richtige Outfit zum die Stadtmuure beschützte! Ändlig, isch es sowit, mir fahre an Start zum Wettstaiplatz – Jetzt no die letschte Griff uf em Waage, isch alles an sim Platz? Hektik kunnt kaini uf bi de Primidoofe, jede Griff sitzt und ich wird eifach mitzoge. Bevor mir definitiv losfahre und uns im Cortège yreihe, stosse mir zäme a – uf e scheeni Fasnacht 2015 – gniessets alli zäme!

Jetzt isch dr Alex gfrogt, sicher & ruggelfrey manövriert er uns uf d’Route. Trotz em Rääge hän sich d’Lüt an Cortege traut, nid Menschemasse, aber es het gnueg Lüt. Fyr mi isch es impossant, grandios und es bruucht nid lang, bin i im Element! E Reesli do, e Orange deert & e Spruch mit Räppli hindedryy. Räge? Han i vergässe, bi uns allne schiint d’Sunne – es isch Fasnacht!

Gfühlt, kuum losgfahre, scho mache mr dr ersti halt bim Klingeli. Kurz ufruume, schnell uf d Toilette und wyter gohts... Uf die Mittleri Brugg, am Ziircher Fernseh verby, es het doch mehr Lüt als dänngt, sie trotze em Wätter. Mir findes e wucht und gniesses wyterhin. Scho wieder Pause? Dängg ich mir. Mir sind scho an dr Spiegelgass acho zum grosse Halt.

Mir dörfe vieli Frinde zum Apèro begriesse und stosse mit allne aa – Prost!

Wyter gohts scho bald, quer durch d Innestadt uf dr üssere Route, Märtplatz, Seibi, Steine, Theater, Bankverein bis zur Aeschevorstadt. Stop! Halt! Fertig! Scho isch min erste Cortège verby.

Dr Waage versorgt dr Alex, mir mache uns uf e Wäg in Käller, e kurze Bsuech und denn ab uf d Gass go chli flanniere, vor em Nachtesse. Für s zNacht isch dr Tömse verantwortlich gsi, mir sind im Elsbethestübli agmolde gsi und es het e Cordonbleu mit französische Frittli geh – fein ischs gsi. Die einte häns warte gnutzt, zum sich chli finde, die andere hän dr Gaudi gha und hän s gmeinsame Esse gnosse.

Nach em zNacht isch es ab uf d Gass...

 

Dr Fasnachts Zyschtig isch wie allewyl ganz im Zeiche vo de Binggis gstande. Zwei Wäägeli voll mit Nochwugs isch vom Phil durch d Innestadt zooge worde. Im Stammkostüm vorus sind mir Aggtive, hindenoche unseri Kleine, wo scho voll dr Drei dusse gha hän – wie die Groose hän sie mitgmacht und freyd gha am Waggis sii.

Zum zNacht het dr Phil in dr St. Johanns-Vorstad reserviert, mit dr ganze Bandi sind mr fein go Pasta esse...

Nach em Esse isch denn dr ersti Teil vo de Prüefig für dr Lehrling agstande – oje, das han y eigentlich welle verdränge! Nüt isch gsi, do duure han au y miesse. E roos Ei, e Glas Milch und e Bierli zum vernichte – Oha, woher wüsse die dass y Eier hasse? Es het uf jede Fall kei Verhandligsspielruum geh, das rohe Ei, het sammt dr Schale ewäg miesse...Details losi an dere Stell jetzt us. Bi uf jede Fall froh gsi, mit Milch und Bier derfe z spiiele. Fertig! han i dänngt gha – nüt isch gsi...es git no e zweite Teil – Oha, was kunnt echt jetzt?!?

Ab in Käller hets gheisse, d Schicht vom Zyschtig Obe überneh. Dr Käller isch voll gsi, e gueti Stimmig. Nur ich ha nid yhne derfe, ha miesse dusse warte uf dr zweiti Priefigsteil. E Baschtröggli, e wisses T-Shört in dr gfühlte Grössi XXS und e schwarzi kruusleti Perügge han y becho. Umzieh isch agseit gsi und denn ab in Käller go serviere – als Käller-Leibeigene-N****.

D Bsuecher im Käller hän dr Gaudi gha, serviere so ohni Portemonnaie isch nid ganz eifach. Es het aber gli gnueg Trinkgeld geh ;-) und zwüsche de Schnitzelbängg in unserem Käller isch d Zyyt wie im Flug vergange. Nach drey Stund bin i erlöst worde und han mi Stammkostüm wieder dörfe aleege.

Wyter isch es gange, scho gli Mitternacht! Ab uf die Mittleri Brugg zum Käppelijoch, go aastosse mitenander. Drno sind mir no chli wyter – ab ins Klaibasel!

 

Dr Fasnachtsmittwuch isch denn au scho gli wieder losgange. Dr Waage im Haafe z Blätzbums abhole, lade und nomol uf d Route! Bevors losgange isch isch no e Fotoschuuting uf em Terminplan gstande. Es Novum in mim erste Joor als Primidoofe...d Sunne isch führecho! Das git jo e Hammercortège. Mir sind wie am Mäntig am Wettstaiplatz ygstande mit em Waage. Via Messeplatz – Claraplatz sind mir zum grosse Waagehalt in dr Spiegelgass gfahre. Dert hän wieder vieli Primidoofe-Fäns uf uns gwartet und mir hän mit Allne derfe uf ei-zwei Gläsli astosse bi wunderscheenen Wätter! Dr Petrus isch halt doch e Fasnächtler. E Dangg an d Heuwänder für s Ständeli wo sie fyr uns gspielt händ.

Nach em Halt sind mir ufe letschte Teil vo dr Route, nomol gniesse isch agseit gsi –wow, es het einiges mehr an Lüt gha und es het so richtig gfäggt.

Nach em offizielle Cortege sind mir denn wieder im Elsbethestübli go z Nachesse und drno in Käller go helfe und denn schliesse am zwei am Morge.

Bis zum Endstraich hän dr Tömse und dr Pit mi begleitet und hän mit mir die letschte Züüg vo dr Fasnacht gnosse. Merci vielmol!

 

Denn hets gheisse Adie Fasnacht! Bis gli, im neue Joor zum 25 jährige Jubiläum!